អនុស្សាវរីយ៍កាលនៅក្មេងវ័យ-ភូមិអ្នកតាទ្វារ

ស្រណោះអនុស្សាកាលនៅក្មេងខ្ចី                                  ធ្លាប់ឃ្វាលក្របីវៃស្នឹងផ្លាស់គោ
មុជទឹកប្រឡែងលេងច្រៀងស្រែកហ៊ោ                            គ្រានោះកម្ររអង្គុយសោកណាស់។
បាចត្រីចាប់គ្រុំម្តុំស្ទឹងតាញ៉ែម                                         រត់ដេញប្រឡែងថ្នល់អ្នកតាទ្វា
វាលលែងក្របីក្រោយផ្ទះតាភា                                        ហូបនំជុំគ្នាក្រោមម្លប់រាំងចាស់។
សាស្រូវលាស់ថ្មីស្រីនៅតែចាំ                                          ភ្លឺស្រែចំណាំបាចរូងកណ្តុល
ចំបើងស្រែប្រាំងដុតអាំងគ្មានសល់                                 ខ្យងក្តាមត្រីផ្ទួសអណ្តែងកំផ្លៀញ។
ឥលូវពេញវ័យរឿងអ្វីក៏ខ្វល់                                            គិតច្រើនអំពល់ទុក្ខសោកជាប់ប្រាណ
គេងក៏មិនលក់បាយក៏មិនបាន                                       បញ្ហាគ្មានស្រានបានទំនេរទេ។
ថ្ងៃនេះនឹកឃើញអនុស្សាវវរីយ៍                                        នៅគ្រប់ទិសទីដូចជាសុបិន្ត
កន្លងទៅបាត់លែងបានមកវិញ                                      ចិត្តខំទន្ទេញស្រែកដង្ហើយហៅ។

សុខ ស្រីពៅ